सब हेड ।
एन .ए .बी संचलित ममता मूकबधिर विद्यालयात गुरुपौर्णिमा उत्सव
प्रतिनिधी । सोलापूर
“नॅब” संचालित ” ममता मूकबधिर विद्यालयात” गुरुपौर्णिमेचा सण अत्यंत उत्साहात आणि मंगलमय वातावरणात साजरा करण्यात आला. कार्यक्रमास प्रमुख पाहुणे म्हणून माजी मुख्याध्यापक वाभय्या म्हेत्रे उपस्थित होते.
कार्यक्रमाची सुरुवात दिव्यांगांच्या गुरु हेलन केलर यांच्या प्रतिमेचे पूजन करून दीपप्रज्वलनाने झाली. यानंतर विद्यालयाच्या वाचा उपचार तज्ञ तेजश्री मॅडम यांनी सांकेतिक भाषेतून व तक्त्याचा उपयोग करून मुलांना गुरुपौर्णिमेविषयी माहिती सांगितली. कर्णबधिर विद्यार्थ्यांकडून गुरूंचे म्हणजे म्हेत्रे सरांचे पूजन करण्यात आले.
प्रमुख पाहुणे वाभय्या म्हेत्रे यांनी विद्यार्थ्यांना मार्गदर्शन करताना सांगितले की, “गुरु हे केवळ ज्ञान देत नाहीत, तर विद्यार्थ्याच्या आयुष्याला योग्य दिशा आणि संस्कार देण्याचे काम करतात. आजच्या डिजिटल युगातही शिक्षकांचे स्थान अबाधित असून, विद्यार्थ्यांनी आपल्या गुरुंचा आणि ज्येष्ठांचा सदैव आदर केला पाहिजे.” त्यांनी आपल्या मनोगतातून महर्षी व्यास यांच्या योगदानावरही प्रकाश टाकला.
कार्यक्रमात कर्णबधिर विद्यार्थ्यांनी सांकेतिक भाषेतून सर्व शिक्षकांना गुरुपौर्णिमेच्या शुभेच्छा दिल्या. याप्रसंगी प्रशालेतील शिक्षकांचा आणि शिक्षकेतर कर्मचाऱ्यांचा गुलाबपुष्प देऊन सत्कार करण्यात आला. त्यानंतर मुलांना खाऊ देण्यात आला.
कार्यक्रमाचे सूत्रसंचालन सौ मेधा जोशी मॅडम यांनी केले तर आभार प्रदर्शन विद्यालाचे मुख्याध्यापिका संगीता गायकवाड मॅडम यांनी मानले. या सोहळ्याला सर्व शिक्षकवृंद, शिक्षकेतर कर्मचारी आणि विद्यार्थी पालक मोठ्या संख्येने उपस्थित होते.
