प्रतिनिधी । सोलापूर
सोलापूर महानगरपालिकेतील कथित नालेसफाई घोटाळ्याची निष्पक्ष व पारदर्शक चौकशी होईपर्यंत प्रभारी नगर अभियंता सारिका अकुलवार यांना सक्तीच्या रजेवर पाठविण्याची मागणी भाजपच्या देशमुख गटातील नगरसेवकांनी महापालिका आयुक्तांकडे केली आहे.
नगरसेवकांचे म्हणणे आहे की, चौकशीदरम्यान संबंधित अधिकाऱ्यांकडे पदभार कायम राहिल्यास चौकशीच्या प्रक्रियेवर परिणाम होण्याची शक्यता नाकारता येत नाही. त्यामुळे निष्पक्ष चौकशीसाठी संबंधित अधिकाऱ्यांना चौकशी पूर्ण होईपर्यंत सक्तीच्या रजेवर पाठविणे आवश्यक असल्याचे त्यांनी निवेदनात नमूद केले आहे.
यासंदर्भात महापालिका आयुक्तांनी तातडीने निर्णय घ्यावा, अशी मागणी करण्यात आली आहे. तसेच, योग्य ती कार्यवाही न झाल्यास आयुक्त कार्यालयास “टाळे ठोको” आंदोलन करण्यात येईल, असा इशाराही भाजप देशमुख गटाच्या नगरसेवकांनी दिला आहे.
