प्रतिनिधी । सोलापूर
शहरातील महिला हॉस्पिटल–विमानतळ–साखर कारखाना हा वाहतुकीच्या दृष्टीने अत्यंत महत्त्वाचा असलेल्या रस्त्याच्या विकासकामाबाबत महापौर विनायक कोंड्याल यांच्या अध्यक्षतेखाली मंगळवारी महापौर कार्यालयात आढावा बैठक झाली. या बैठकीत आवश्यक तांत्रिक बाबींची पूर्तता होईपर्यंत रस्त्याचे काम थांबविण्याचे आदेश महापालिका आयुक्त डॉ. सचिन ओम्बासे यांनी दिले. तसेच सर्व संबंधित विभागांनी परस्पर समन्वयाने नियोजन करून भविष्यात नव्याने तयार झालेला रस्ता पुन्हा खोदण्याची वेळ येणार नाही, याची दक्षता घेण्याचे निर्देश देण्यात आल या बैठकीला उपमहापौर ज्ञानेश्वरी देवकर, सभागृह नेते नरेंद्रजी काळे, अतिरिक्त आयुक्त संदीप कारंजे, एमएसआयडीसीचे कार्यकारी अभियंता उमेश झगडे, उपायुक्त गिरीश पंडित, नगरसेवक सात्विक बडवे, शिवाजी वाघमोडे, वैभव हत्तुरे, दीपक जमादार, जयकुमार माने, अझर हुंडेकरी, अझरुद्दीन जाहगीरदार, नगरसेविका संगीता जाधव, आनीसा मोगल, सफिया चौधरी तसेच एमएसआयडीसी आणि महापालिकेचे संबंधित अधिकारी उपस्थित होते.
या बैठकीत महिला हॉस्पिटल ते साखर कारखाना या मार्गावरील विद्यमान ड्रेनेज लाईन, ५०० मिमी व्यासाची मुख्य पिण्याच्या पाण्याची जलवाहिनी, स्टॉर्म वॉटर ड्रेनेज, वीजवाहिन्या, चौकांचे नियोजन आणि रस्त्याची कनेक्टिव्हिटी या सर्व बाबींचा सविस्तर आढावा घेण्यात आला. महापालिकेच्या विविध विभागांनी संयुक्त पाहणी करून एमएसआयडीसीकडे पाठविलेल्या पत्रातील सूचनांवरही चर्चा करण्यात आली.
महापौर विनायक कोंड्याल यांनी हा रस्ता शहराच्या वाहतुकीचा महत्त्वाचा दुवा असल्याचे सांगत, भविष्यात नागरिकांना कोणत्याही प्रकारचा त्रास होऊ नये यासाठी सर्व भूमिगत सुविधा पूर्ण झाल्यानंतरच अंतिम स्वरूपात रस्त्याचे काम करण्यात यावे, असे स्पष्ट केले.
