प्रतिनिधी । सोलापूर
सोलापूर महानगरपालिकेच्या उत्पन्नात वाढ करण्यासोबतच महापालिकेच्या मालकीच्या गाळे आणि इतर भाडेतत्त्वावरील मालमत्ताधारकांना थकीत भाडे भरण्यास दिलासा मिळावा, या उद्देशाने ‘अभय योजना–२०२६’ लागू करण्यात आली आहे.
या योजनेचा लाभ मेजर गाळेधारक, मिनी गाळेधारक, खुल्या जागेचे धारक, अधिकृत खोकेधारक, बीओटी गाळेधारक, १५६ गाळेधारक तसेच टी.पी. ३/२३ अंतर्गत येणाऱ्या भाडेकरूंना घेता येणार आहे.चालू वर्षाचे भाडे आणि मागील थकबाकी मिळून महापालिकेने या योजनेतून तब्बल २५ कोटी रुपयांच्या वसुलीचे उद्दिष्ट ठेवले आहे.योजना सुरू होऊन एक महिना पूर्ण झाला असून, या कालावधीत १ कोटी ८२ लाख रुपयांची वसुली करण्यात आली आहे. तर थकीत रकमेवरील तब्बल ३७ लाख रुपयांचा दंड माफ करण्यात आला आहे. त्यामुळे थकबाकीदार गाळेधारकांना दंडाच्या सवलतीसह आपली थकबाकी भरून नियमित होण्याची संधी मिळाली आहे.
महापालिकेच्या उत्पन्नवाढीच्या दृष्टीने ही योजना महत्त्वाची मानली जात असून, येत्या काळात वसुलीला आणखी वेग देण्याचे प्रशासनाचे उद्दिष्ट आहे.
दरम्यान, ‘अभय योजना–२०२६’ची अंतिम मुदत २४ ऑगस्ट २०२६ पर्यंत आहे. त्यामुळे संबंधित मालमत्ताधारकांनी या संधीचा लाभ घेत थकीत गाळेभाडे आणि इतर देय रक्कम भरून महापालिकेला सहकार्य करावे, असे आवाहन महापालिका अतिरिक्त आयुक्त वीणा पवार यांनी केले आहे.
