प्रतिनिधी । सोलापूर
शाळेत जाणाऱ्या अवघ्या ९ वर्षांच्या अल्पवयीन मुलीचे अपहरण करून तिच्यावर निर्घृण लैंगिक अत्याचार करणाऱ्याला सोलापूर न्यायालयाने मरेपर्यंत तुरुंगवासाची ऐतिहासिक आणि कठोर शिक्षा सुनावली आहे. सोलापूरचे जिल्हा व विशेष न्यायाधीश जे. जे. मोहीते यांनी हा महत्त्वपूर्ण निकाल दिला असून, आरोपीला मरेपर्यंत कारावास आणि एकूण ७१ हजार रुपये दंडाची शिक्षा ठोठावली आहे. बापू सिद्धप्पा कुसेकर (वय २५, रा. अक्कलकोट, जि. सोलापूर) असे शिक्षा झालेल्या आरोपीचे नाव आहे.
हे धक्कादायक प्रकरण २०१४ मधील आहे. पीडित मुलगी अवघ्या ९ वर्षांची असताना, ती शाळेत जात असताना आरोपी बापू कुसेकर याने तिला तिच्या आईच्या ताब्यातून बेकायदेशीररित्या आणि जबरदस्तीने पळवून नेले होते. त्यानंतर अक्कलकोट परिसरातील एका निर्जन दगडाच्या खाणीत नेऊन, आरोपीने तिला अमानुष मारहाण केली आणि तिच्यावर जबरदस्तीने शारीरिक अत्याचार केला. ही निष्पाप मुलगी नंतर गंभीर जखमी अवस्थेत आढळून आली होती. याप्रकरणी पीडितेच्या आईने अक्कलकोट उत्तर पोलीस ठाण्यात तक्रार दाखल केली होती. न्यायालयात सरकारी पक्षाचा युक्तिवाद ठरला प्रभावीया गुन्ह्याचा तपास तत्कालीन सहाय्यक पोलीस निरीक्षक विलास नाळे आणि काकडे यांनी केला. त्यांनी आरोपीविरुद्ध भक्कम आणि तांत्रिक पुरावे गोळा करून न्यायालयात दोषारोपपत्र दाखल केले. न्यायालयात सरकार पक्षातर्फे शासकीय अभियोक्ता ॲड. कविता बागल यांनी प्रभावी काम पाहिले.
खटल्या दरम्यान सरकारी पक्षाने मांडलेले पुरावे, पीडितेची साक्ष, तिला पळवून नेताना पाहणारा प्रत्यक्षदर्शी साक्षीदार, डॉक्टरांची वैद्यकीय साक्ष आणि तांत्रिक पुरावे अत्यंत महत्त्वाचे ठरले. ॲड. कविता बागल यांचा युक्तिवाद ग्राह्य धरत न्यायालयाने आरोपीला बाल लैंगिक अत्याचार विरोधी कायदा (पोक्सो) व इतर कलमांखाली दोषी ठरवून ही कठोर शिक्षा सुनावली.
हा खटला तार्किक शेवटास नेण्यासाठी पोलीस अधीक्षक अतुल कुलकर्णी, अप्पर पोलीस अधीक्षक विजय कबाडे आणि तत्कालीन एसडीपीओ विलास यामावार यांनी वेळोवेळी मार्गदर्शन केले. तसेच तत्कालीन पोलीस निरीक्षक दीपक भिताडे, प्रभारी अधिकारी अविनाश पवार यांच्या मदतीने कोर्ट पैरवी अधिकारी पोलीस उपनिरीक्षक विजयकुमार जाधव, पोलीस कॉन्स्टेबल अजित सुरवसे आणि सचिन पुजारी यांनी न्यायालयात भक्कम पुरावे सादर करण्यासाठी विशेष परिश्रम घेतले.
