प्रतिनिधी । सोलापूर
एमआयडीसी चिंचोली येथील जी.पी. इंडस्ट्रीज कंपनीच्या आवारात आज एक अत्यंत दुर्दैवी घटना घडली. दुपारी १२:४५ वाजण्याच्या सुमारास कंपनीत टँकरमध्ये पाणी भरताना शॉक लागून मृत्यू झाला आहे.
मिळालेल्या प्राथमिक माहितीनुसार, मृत व्यक्तीचे नाव निजामोद्दीन नदाफ (वय ५० वर्षे, रा. नई जिंदगी, सिध्देश्वर नगर भाग ४) असे आहे. गुरूवारी दुपारी जी.पी. इंडस्ट्रीजमध्ये टँकरच्या साहाय्याने पाणी भरण्याची प्रक्रिया सुरू होती. त्यादरम्यान पाण्याच्या टँकरजवळ काम करताना शॉक बसला. ही घटना समजताच तेथील कर्मचारी हे मदतीला धावले. या गंभीर घटनेनंतर दुपारी साधारण १:५५ वाजता मृत निजामोद्दीन यांचे भाऊ पीरसाब नदाफ यांनी त्यांना तातडीने शासकीय रुग्णालयात उपचारासाठी दाखल केले. मात्र, दुर्दैवाने रुग्णालयात पोहोचण्यापूर्वीच त्यांचा मृत्यू झाल्याचे डॉक्टरांनी घोषित केले. या घटनेची नोंद सिव्हिल पोलिस चौकीत झाली आहे.