प्रतिनिधी । सोलापूर
सोलापूर महापालिकेच्या नालेसफाई कामातील कथित आर्थिक अनियमिततेचा वाद आता आणखी चिघळण्याची शक्यता आहे. नालेसफाईच्या कामात कोणत्याही मक्तेदाराला अतिरिक्त किंवा जादा बिल देण्यात आलेले नाही, असा खुलासा महापालिकेच्या सर्वसाधारण सभेत करण्यात आला होता. मात्र, माहिती अधिकारातून मिळालेल्या कागदपत्रांच्या आधारे नगरसेवक अनंत जाधव यांनी याच दाव्यावर गंभीर प्रश्नचिन्ह उपस्थित केले आहे.
तब्बल सुमारे ८० लाख रुपयांची अतिरिक्त बिले तीन मक्तेदारांना अदा करण्यात आल्याचा दावा जाधव यांनी केला आहे. विशेष म्हणजे, संबंधित अतिरिक्त रक्कम मक्तेदारांकडून वसूल करण्यासाठी महापालिका आयुक्तांकडे परवानगी मागण्यात आल्याचे दस्तऐवजही समोर आणल्याचा जाधव यांचा दावा आहे.
त्यामुळे सभागृहात करण्यात आलेला खुलासा आणि कार्यालयीन कागदपत्रांमधील नोंदी यामध्ये नेमका विरोधाभास का आहे? सभागृहाची दिशाभूल झाली का? असा सवाल आता अनंत जाधव यांनी उपस्थित केला आहे दरम्यान महापालिकेच्या नालेसफाई कामातील कथित गैरव्यवहाराचा मुद्दा पुन्हा एकदा ऐरणीवर आला आहे.माहिती अधिकारातून मिळालेल्या कागदपत्रांच्या आधारे नगरसेवक अनंत जाधव यांनी तब्बल सुमारे ८० लाख रुपयांची अतिरिक्त बिले तीन मक्तेदारांना अदा करण्यात आल्याचा दावा केला आहे.
“अतिरिक्त बिल दिलेले नाही” असा खुलासा आणि दुसरीकडे कार्यालयीन कागदपत्रांमध्ये अतिरिक्त रक्कम अदा झाल्याचे नमूद असल्याचा दावा…या दोन्ही बाबींमुळे आता प्रशासनाच्या कार्यपद्धतीवर गंभीर प्रश्न उपस्थित झालेआहेत.सभागृहात अधिकृतपणे मांडलेली माहिती आणि कार्यालयीन नोंदी यामध्ये तफावत असेल, तर नेमकी खरी माहिती कोणती? हा प्रश्न आता महापालिका प्रशासनासमोर उभा ठाकला आहे.नगरसेवक अनंत जाधव यांनी नालेसफाई कामातील आर्थिक अनियमिततेबाबत आणखी काही गंभीर बाबींचे पुरावे लवकरच सार्वजनिक करणार असल्याचे सांगितले आहे.
