प्रतिनिधी । सोलापूर घरचा अभ्यास पूर्ण करून न आणल्याच्या कारणावरून आठ वर्षांच्या विद्यार्थ्याला वर्गात शिक्षकाने मारहाण केल्याची घटना सोलापुरातील श्री दिगंबर जैन गुरुकुल प्राथमिक शाळेत घडली. या प्रकरणी संबंधित वर्गशिक्षकाविरुद्ध बाल न्याय कायद्यानुसार गुन्हा दाखल करण्यात आला आहे.
पोलिसांनी दिलेल्या माहितीनुसार, तुळजापूर येथील रहिवासी सिद्धार्थ (सध्या सोलापूर) यांच्या मुलासोबत २८ जुलै रोजी सकाळी ही घटना घडली. विद्यार्थ्याने दिलेला घरचा अभ्यास पूर्ण केला नसल्याने वर्गशिक्षक प्रतीक प्रवीणकुमार मेहता यांनी त्याला रागाच्या भरात लाकडी पट्टीने डोक्यावर मारहाण केली. तसेच पाठीवर हाताने व बुक्क्यांनी मारल्याचे तक्रारीत नमूद करण्यात आले आहे.
या प्रकारात बालकाला दुखापत झाल्याचे फिर्यादीत म्हटले आहे. आठ वर्षांचे बालक असल्याची जाणीव असतानाही शिक्षकाने त्याच्यावर मारहाण केल्याचा आरोप करण्यात आला आहे. या प्रकरणी शिक्षक प्रतीक मेहता याच्याविरुद्ध बाल न्याय कायद्यातील कलम ७५ अंतर्गत गुन्हा दाखल करण्यात आला आहे. पुढील तपास पोलिस हवालदार घुगे करीत आहेत.
