प्रतिनिधी । सोलापूर
रेल्वे स्टेशन परिसरातील वाहन पार्किंगमध्ये अमली पदार्थ विक्रीसाठी आलेल्या भिवंडीतील ड्रग तस्कराला सोलापूर गुन्हे शाखेने सापळा रचून अटक केली. अल्तमश मुस्तफा शेख (वय ३१, रा. तुळसी नगर, बिस्मिल्ला बेकरी जवळ, खाडीपार, भिवंडी, जि. ठाणे) असे आरोपीचे नाव आहे. त्याच्याकडून ५६.९४० ग्रॅम मेफेड्रॉन (एमडी), मोबाईल व रोख रक्कम असा एकूण १ लाख ८६ हजार रुपयांचा मुद्देमाल जप्त करण्यात आला. ही कारवाई बुधवारी (दि. २३) रात्री करण्यात आली.
सदर बाजार पोलिस रात्री नऊच्या सुमारास रेल्वे स्टेशन परिसरात गस्त घालत असताना, बाहेरील ब्रिजजवळील पाण्याच्या टाकीजवळील वाहन पार्किंगमध्ये एक संशयित तरुण थांबल्याची माहिती मिळाली. पोलिसांनी तत्काळ घटनास्थळी धाव घेत त्याला ताब्यात घेऊन पंचांसमक्ष अंगझडती घेतली असता त्याच्याकडे १ लाख ७० हजार ८२० रुपये किमतीचे ५६.९४० ग्रॅम एमडी आढळून आले. आरोपी हा सोलापूर शहरात विक्रीच्या उद्देशाने हा अमली पदार्थ घेऊन आल्याचे तपासात समोर आले.
ही कारवाई वरिष्ठ पोलिस निरीक्षक अजित लकडे, पोलिस निरीक्षक रवींद्रनाथ भंडारे यांच्या मार्गदर्शनाखाली डी.बी.चे प्रमुख सपोनि राहुल सावंत, अंमलदार मुलाणी, राजेश चव्हाण, प्रमोद पक्षाले, अय्याज बागलकोटे, विशाल बोराडे, उमेश चव्हाण, हणमंत पुजारी, अमीन शेख, सागर गुंड, सोमनाथ सुरवसे, काशिनाथ वाडेकर आणि आनंद निंबाळकर यांनी केली. आरोपीला न्यायालयाने सहा दिवसांची पोलिस कोठडी सुनावली असून, पुढील तपास सपोनि राहुल सावंत करीत आहेत.
