प्रतिनिधी । सोलापूर
साखरपेठेतील कै. यशोदाबाई दिड्डी नागरी प्राथमिक आरोग्य केंद्रामागील महापालिकेच्या वाचनालयाच्या इमारतीत अनधिकृत सायकल गोडाऊन आणि प्रतिबंधित गुटखा-मावा निर्मितीचा अड्डा सुरू असल्याचा धक्कादायक प्रकार उघडकीस आला. मंगळवारी रात्री आठच्या सुमारास मनपा आयुक्त डॉ. सचिन ओंबासे यांच्या पाहणीत हा प्रकार समोर आला. त्यानंतर त्यांनी कारवाईचे निर्देश दिले. संबंधित ठिकाणचे साहित्य जप्त करण्यात आले असून, गुन्हा दाखल करण्याची प्रक्रिया सुरू करण्यात आली आहे.
आरोग्य केंद्राची इमारत जर्जर झाली असून, छताचे स्लॅब कोसळत असल्याच्या आणि मूलभूत सुविधांचा अभाव असल्याच्या तक्रारी होत्या. पाहणीसाठी आयुक्त डॉ. सचिन ओंबासे, आरोग्याधिकारी डॉ. राखी माने, नगरसेवक अमर पुदाले, नगरसेवक प्रवीण दर्गोपाटील, माजी नगरसेवक पांडुरंग दिड्डी, उपअभियंता अविनाश वाघमारे, विभागीय अधिकारी राघवेंद्र गायधनकर आणि कनिष्ठ अभियंता सलमान मणियार आदी उपस्थित होते. यावेळी आयुक्तांनी मागील आवाराची पाहणी केली असता, महापालिकेच्या जागेतील अनधिकृत व्यवसाय उघडकीस आला.
आरोग्य केंद्रामागील सुमारे ५०० ते ६०० चौरस फुटांच्या वाचनालयाच्या इमारतीचे कुलूप व दरवाजा तोडून त्यावर कब्जा करण्यात आल्याचे निदर्शनास आले. इमारतीत विक्रीसाठी १०० ते २०० नवीन सायकली, टायर्स, ट्यूब्स आणि गॅरेजचे साहित्य साठवण्यात आले होते. तसेच शेजारील खोलीत ओला व सुका मावा आणि प्रतिबंधित गुटखा तयार करण्याचे काम सुरू असल्याचे आढळले. येथे टेबल-खुर्च्यांची व्यवस्था करून कामगार दिवसभर मावा तयार करत असल्याची माहिती समोर आली.
दिवसभर माव्याची निर्मिती; कर्मचाऱ्यांना धमकी
या बेकायदेशीर व्यवसायाला आरोग्य केंद्रातील डॉक्टर आणि कर्मचाऱ्यांनी विरोध करण्याचा प्रयत्न केला असता, संबंधितांनी त्यांना धमकी दिल्याची माहिती सूत्रांनी दिली. रुग्णालयात रुग्ण उपचारांसाठी येत असताना, त्याच परिसरातील महापालिकेच्या जागेत असे प्रकार सुरू असल्याचे पाहून आयुक्तांनी तातडीने कारवाईचे निर्देश दिले.
२०० सायकलींसह साहित्य जप्त
आयुक्तांच्या आदेशानंतर अतिक्रमण निर्मूलन पथक आणि पोलिसांना घटनास्थळी बोलावण्यात आले. पोलिसांनी गोडाऊनमधील सायकली सील केल्या असून, तेथील साहित्य जप्त करण्याची कारवाई करण्यात आली. या प्रकरणातील संबंधितांवर गुन्हा दाखल करण्याची प्रक्रिया सुरू आहे.
पाहणीवेळी धक्कादायक प्रकार उघड
“पाहणीसाठी मागील बाजूस गेल्यानंतर हा प्रकार पाहून आम्हालाही धक्का बसला. त्यावेळी आयुक्तांनी घटनास्थळी थांबून कारवाई करण्यास सांगितले. संबंधितांवर कडक कारवाई करावी, अशी मागणी आम्ही केली आहे,” अशी प्रतिक्रिया नगरसेवक प्रवीण दर्गोपाटील यांनी दिली.
