सब हेड । पुणे लाचलुचपत प्रतिबंधक विभागाची कारवाई
प्रतिनिधी । सोलापूर येथील आत्मा प्रकल्प संचालक कार्यालयात उपसंचालक म्हणून कार्यरत असलेले किरण श्यामराव जाधव यांनी ज्ञात उत्पन्नापेक्षा तब्बल ४ कोटी ३७ लाख ८४ हजार ९३० रुपयांची अपसंपदा भ्रष्ट मार्गाने जमवल्याचे लाचलुचपत प्रतिबंधक विभागाच्या उघड चौकशीत निष्पन्न झाले आहे. उत्पन्नापेक्षा १२८.७ टक्के अधिक मालमत्ता आढळल्याने किरण जाधव आणि त्यांची पत्नी संगीता जाधव यांच्याविरुद्ध पुण्यात गुन्हा दाखल करण्यात आला आहे.
किरण जाधव हे यापूर्वी कृषी विभागाच्या दक्षता पथकात कृषी उपसंचालक तसेच गुणनियंत्रण विभागात तंत्र अधिकारी म्हणून कार्यरत होते. सध्या ते सोलापूर येथील प्रकल्प संचालक कार्यालय, आत्मा येथे उपसंचालक (वर्ग-१) पदावर कार्यरत आहेत. त्यांच्याविरुद्ध उघड चौकशी करण्याचे आदेश प्राप्त झाल्यानंतर लाचलुचपत प्रतिबंधक विभागाने तपास केला. ४ जून १९९४ ते २ डिसेंबर २०२५ या परीक्षण कालावधीत त्यांच्या वैध उत्पन्नाच्या तुलनेत ४ कोटी ३७ लाख ८४ हजार ९३० रुपयांची अपसंपदा आढळून आली.
या प्रकरणात किरण जाधव यांना अपसंपदा जमविण्यास पत्नी संगीता जाधव यांनी अपप्रेरणा दिल्याचे चौकशीत निष्पन्न झाल्याचे विभागाने म्हटले आहे. त्यानुसार दोघांविरुद्ध पुणे शहरातील बंडगार्डन पोलीस ठाण्यात २ नोव्हेंबर २०२६ रोजी सायंकाळी ५.०८ वाजता गुन्हा नोंदविण्यात आला. भ्रष्टाचार प्रतिबंधक अधिनियमातील संबंधित कलमे तसेच भारतीय न्याय संहिता २०२३ मधील कलम ४९ अन्वये ही कारवाई करण्यात आली आहे.
या प्रकरणाची चौकशी अपर पोलीस अधीक्षक अजित पाटील यांनी केली असून, पुढील तपास अपर पोलीस अधीक्षक अर्जुन भोसले करीत आहेत. पुणे लाचलुचपत प्रतिबंधक विभागाचे पोलीस अधीक्षक शिरीष सरदेशपांडे यांच्या मार्गदर्शनाखाली ही कारवाई करण्यात आली
