प्रतिनिधी । सोलापूर
सातारा, ठाणे आणि बीड येथील न्यायालयांनंतर आता सोलापूर जिल्हा व सत्र न्यायालयालाही बॉम्बने उडवून देण्याची धमकी देणारा ई-मेल प्राप्त झाला आहे. या घटनेमुळे न्यायालय परिसरात खळबळ उडाली असून, पोलीस यंत्रणा तातडीने सतर्क झाली आहे.
धमकीचा ई-मेल मिळताच वरिष्ठ पोलीस अधिकारी न्यायालयात दाखल झाले. खबरदारीचा उपाय म्हणून संपूर्ण न्यायालय परिसर रिकामा करण्याची कार्यवाही हाती घेण्यात आली. न्यायालयात उपस्थित असलेल्या न्यायाधीश, वकील आणि सुनावणीसाठी आलेल्या पक्षकारांना तातडीने बाहेर काढण्यात आले. तसेच परिसरात काम सुरू असल्याने तेथे उपस्थित असलेल्या मजुरांनाही सुरक्षिततेच्या दृष्टीने बाहेर हलविण्यात आले.
दरम्यान, धमकीच्या पार्श्वभूमीवर पोलिसांकडून न्यायालय परिसराची तपासणी सुरू करण्यात आली आहे. संभाव्य धोका टाळण्यासाठी आवश्यक सुरक्षाविषयक उपाययोजना केल्या जात असून, या घटनेमुळे न्यायालयीन वर्तुळात चिंतेचे वातावरण निर्माण झाले आहे.
