प्रतिनिधी ।सोलापूर
सोलापूर विमानतळावर रेडबर्ड फ्लाइट ट्रेनिंग अकादमीच्या प्रशिक्षणार्थी विमानाच्या लँडिंगदरम्यान पुढील चाकाचा (नोज व्हील) टायर फुटल्याची घटना गुरुवारी घडली. सुदैवाने या घटनेत कोणतीही जीवितहानी झाली नाही.
मिळालेल्या प्राथमिक माहितीनुसार, सदर प्रशिक्षणार्थी विमानाने कलबुर्गी-बारामती-सोलापूर-कलबुर्गी असा प्रशिक्षणासाठी उड्डाणाचा मार्ग निश्चित केला होता. सोलापूर विमानतळावर विमानाचे लँडिंग होत असताना पुढील चाकाचे टायर फुटले. मात्र, प्रशिक्षणार्थी वैमानिकाने प्रसंगावधान राखत विमान सुरक्षितपणे हाताळले.
या घटनेत प्रशिक्षणार्थी वैमानिकाला कोणतीही दुखापत झालेली नाही. खबरदारीचा उपाय म्हणून त्याला वैद्यकीय तपासणी व फिटनेस तपासणीसाठी शहरातील रुग्णालयात नेण्यात आले आहे. दरम्यान, नुकसानग्रस्त विमानाभोवती सुरक्षेच्या दृष्टीने बॅरिकेडिंग करून परिसर बंद करण्यात आला आहे.तात्काळ अग्निशमन यंत्रणा कार्यान्वित करण्यात आली.
या घटनेमुळे विमानतळ परिसरात काही काळ चर्चा सुरू झाली होती. सुदैवाने मोठा अनर्थ टळला.
