प्रतिनिधी । सोलापूर
१५ कोटींचे कर्ज मिळवून देण्याच्या नावाखाली फसवणूक; बनावट शासकीय शिक्के, डिजिटल अरेस्टचा धाक
सोलापूर : गोल्डन टॉवर प्रकल्पासाठी १५ कोटी रुपयांचे कर्ज मिळवून देण्याचे आमिष दाखवून एका व्यावसायिकाची तब्बल ७७ लाख २५ हजार रुपयांची फसवणूक केल्याचा धक्कादायक प्रकार उघडकीस आला आहे. पैसे परत मागितल्यानंतर आरोपींनी बनावट शासकीय शिक्के व स्वाक्षऱ्यांचा वापर करून ब्लॅकमेल केले. तसेच लॉरेन्स बिश्नोई गँगच्या शूटरकडून जीवे मारण्याची आणि डिजिटल अरेस्ट करण्याची धमकी दिल्याचे फिर्यादीत नमूद आहे.
याप्रकरणी समीर वाल्मीक अहिरे (रा. स्वामी विवेकानंद नगर, सैफुल, सोलापूर) यांच्या फिर्यादीवरून हरजित सिंग रुपराह, धर्मेंद्र विनोदानंद झा, आरव अग्रवाल, अशोक सिंधल, दीपक अरोरा, मोहिणी धर्मेंद्र झा आणि गणेश देशमुख यांच्याविरुद्ध विजापूर नाका पोलीस ठाण्यात गुन्हा दाखल झाला आहे. आरोपी दिल्ली व छत्रपती संभाजीनगर येथील असल्याचे फिर्यादीत म्हटले आहे.
ऑगस्ट २०२५ पासून गणेश देशमुख व झा यांनी १५ कोटी रुपयांचे कर्ज विनाकमिशन मिळवून देण्याचे आश्वासन दिले. त्यासाठी दिल्लीतील अन्य आरोपींशी ओळख करून दिली. साईट व्हिजिट व कायदेशीर कागदपत्रांसाठी दोन लाख, स्टॅम्प ड्युटीच्या नावाखाली ५० लाख आणि अन्य कारणांसाठी संतोष राठोड व मनोज सुरवसे यांच्यामार्फत २५ लाख २५ हजार रुपये घेण्यात आले. अशा प्रकारे एकूण ७७ लाख २५ हजार रुपये उकळण्यात आले. त्यानंतर आरोपींनी कर्ज मंजुरीचे बनावट पत्र तयार करून त्यावर सब रजिस्ट्रार कार्यालय, सोलापूर क्र. २ यांचा बनावट शिक्का व स्वाक्षरी केली. मात्र, कर्ज मंजूर न झाल्याने फिर्यादीने पैसे परत मागितले.
यावेळी धर्मेंद्र झा याने लॉरेन्स बिश्नोई गँगचा शूटर असल्याचे सांगून संतोष राठोड यांना जीवे मारण्याची धमकी दिली. तर हरजित सिंग याने फिर्यादी व त्यांच्या पत्नीला घर सोडून जाण्यास सांगत अन्यथा डिजिटल अरेस्ट करण्याची धमकी दिल्याचे फिर्यादीत नमूद आहे. अशा प्रकारे कर्ज मिळवून देण्याच्या आमिषाने आर्थिक फसवणूक होऊ शकते. त्यामुळे नागरिकांनी सतर्क राहावे आणि अशा संशयास्पद प्रकारांची माहिती पोलिसांना द्यावी. या आरोपींविरुद्ध छत्रपती संभाजीनगर येथेही गुन्हा दाखल झाल्याची माहिती असून, त्याची पडताळणी करून तपास सुरू आहे, अशी माहिती तपास अधिकारी आर्थिक गुन्हे शाखेचे सपोनि बालाजी मस्के यांनी दिली.
