प्रतिनिधी । सोलापूर
विजापूर-सोलापूर मार्गावर गावठी पिस्तूल आणि पाच जिवंत काडतुसे घेऊन फिरणाऱ्या तरुणास विजापूर नाका पोलिसांनी अटक केली. त्याच्या चौकशीतून पिस्तूल व काडतुसे पुरविणाऱ्या आईस्क्रीम विक्रेत्यालाही पोलिसांनी ताब्यात घेतले. दोघेही कर्नाटकातील असल्याची माहिती पोलिसांनी दिली आहे.
मंजूनाथ शांतप्पा निरणशेट्टी (वय ३९, रा. इंडी, विजापूर, कर्नाटक) याच्याकडून देशी बनावटीचे एक गावठी पिस्तूल, पाच जिवंत काडतुसे, दोन मोबाईल आणि मोटारसायकल असा एकूण १ लाख ३६ हजार रुपयांचा मुद्देमाल जप्त करण्यात आला. याबाबत सहाय्यक पोलिस आयुक्त विजयालक्ष्मी कुर्री आणि वरिष्ठ पोलिस निरीक्षक सुहास चव्हाण यांनी शुक्रवारी पत्रकार परिषदेत माहिती दिली.
विजापूर नाका पोलिस ठाण्याच्या गुन्हे प्रकटीकरण पथकाला विजापूर-सोलापूर मार्गावर मोटारसायकलवरून एक व्यक्ती गावठी पिस्तूल व काडतुसे घेऊन फिरत असल्याची माहिती मिळाली होती. त्यानुसार पथकाने १९ ऑगस्ट रोजी पहाटे सुमारे २.२६ वाजता मंजूनाथ निरणशेट्टी याला ताब्यात घेतले. झडतीमध्ये त्याच्याकडे लोखंडी बॉडी असलेले देशी बनावटीचे गावठी पिस्तूल आणि पाच जिवंत काडतुसे आढळून आली.
पोलिस कोठडीत चौकशीदरम्यान मंजूनाथ याने हे पिस्तूल व काडतुसे इंडी येथील त्याचा मित्र, आईस्क्रीम विक्रेता घनश्याम दल्लीचंद जाट (वय २७, रा. राजस्थान, सध्या इंडी, कर्नाटक) याच्याकडून घेतल्याची माहिती दिली. त्यानंतर पोलिसांनी घनश्याम जाट यालाही अटक केली.
ही कारवाई पोलिस आयुक्त एम. राजकुमार, पोलिस उपायुक्त प्रीतम यावलकर, सहाय्यक पोलिस आयुक्त विजयालक्ष्मी कुर्री, वरिष्ठ पोलिस निरीक्षक सुहास चव्हाण आणि पोलिस निरीक्षक सुशांत वराळे यांच्या मार्गदर्शनाखाली गुन्हे प्रकटीकरण पथकाने केली. पथकात सपोनि शितलकुमार गायकवाड, आप्पासाहेब पवार, सचिन हार, अजय परदेशी, लक्ष्मीकांत फुटाणे, शंकर भिसे, गणेश शिर्के, संतोष माने, स्वप्नील जाधव, राजू पवार, समाधान मारकड, अमृत सुरवसे, राहुल विटकर, शाबोद्दीन आबादीराजे, संतोष चानकोटी, रमेश कोर्सेगाव आणि श्रीरंग काशिद यांचा समावेश होता.
