प्रतिनिधी । सोलापूर
राज्यात आषाढी वारीचा उत्सव सुरू असताना पंढरपुरातच एक दुःखद घटना घडली आहे. पांडुरंगाच्या भक्तांकरिता बंदोबस्त करण्यासाठी आलेल्या राज्य राखीव बलाच्या एका जवानाने पंढरपुरातच आषाढी सोहळ्याच्या दरम्यान स्वतःवर गोळ्या झाडून आत्महत्या केल्याची घटना घडली आहे.
ही घटना शनिवारी पहाटे अडीचच्या सुमारास घडली आहे. राज्य राखीव बलातील जी आर १४ गटात काम करणारे रामेश्वर ध्रुपद साबणे (रा. गंगाखेड, ता. गंगाखेड जि परभणी ) असे त्यांचे नाव आहे. रामेश्वर ध्रुपद साबणे संभाजी नगर येथे एस आर पी विभागात रुजू होते. आषाढी यात्रेनिमित्त पंढरपूर येथे बंदोबस्तासाठी आले होते. त्यांनी पंढरपूर – कासेगाव रस्त्यावरील त्यांच्या मुक्कामाच्या ठिकाणी स्वतःवर गोळ्या झाडून आत्महत्या केली आहे. आत्महत्या का केली याबाबत कोणताही खुलासा झालेला नसून किंवा कारण समजलेले नसून याबाबत पोलीस यंत्रणेकडून अधिक तपास सुरू आहे.