प्रतिनिधी । सोलापूर
शहरातील कायदा व सुव्यवस्था अबाधित राखण्यासाठी सोलापूर शहर पोलिसांनी गुन्हेगारांवर कठोर कारवाईचा बडगा उगारला आहे. विविध गंभीर स्वरूपाचे गुन्हे दाखल असलेला सराईत आरोपी बसु सुनकप्पा अण्णारेड्डी (वय ४८, रा. धम्म नगर, कोंचीकोरवी गल्ली, मौलाली चौक, सोलापूर) याला सोलापूर शहर आणि संपूर्ण सोलापूर जिल्ह्यातून १ वर्षासाठी तडीपार (हद्दपार) करण्यात आले आहे.
आरोपी बसु अण्णारेड्डी याच्याविरुद्ध सन २०१७, २०२० आणि २०२६ या कालावधीत गैरकायद्याची मंडळी जमवून दंगा व मारामारी करणे, प्राणघातक शस्त्रे बाळगून परिसरात दहशत निर्माण करणे आणि जीवे मारण्याचा प्रयत्न करणे यांसारखे गंभीर गुन्हे दाखल आहेत.
त्याच्या वाढत्या गुन्हेगारी कारवायांना आळा घालण्यासाठी सदर बझार पोलीस ठाण्याच्या वतीने महाराष्ट्र पोलीस अधिनियम १९५१ मधील कलम ५६ (१) (अ) (ब) अन्वये तडीपारीचा प्रस्ताव पोलीस उप-आयुक्त (परिमंडळ), सोलापूर शहर यांच्याकडे सादर करण्यात आला होता.
या प्रस्तावाची गांभीर्याने दखल घेत, पोलीस उप-आयुक्त श्री. प्रितम यावलकर यांनी सुनावणी व चौकशीअंती तडीपारीचा आदेश (जा.क्र. १९६७/२०२६, दि. २२/०७/२०२६) जारी केला. त्यानुसार आरोपी बसु अण्णारेड्डी याला १ वर्षाच्या कालावधीसाठी सोलापूर शहर व संपूर्ण सोलापूर जिल्हा क्षेत्रातून तडीपार करण्यात आले आहे.
गुन्हेगारी प्रवृत्तीच्या व्यक्तींवर अशीच कडक कारवाई पुढेही सुरू राहील, असा इशारा पोलीस प्रशासनाकडून देण्यात आला आहे.
