प्रतिनिधी । सोलापूर
शहरातील महावीर चौक परिसरातील एका शोरूमबाहेर विद्यमान आमदार कल्याणशेट्टी यांच्या चालकाला पैशांचे आमिष दाखवून आमदारांना गोळ्या घालून ठार मारण्यासाठी प्रवृत्त केल्याचा धक्कादायक प्रकार समोर आला आहे. या प्रकरणी सदर बाजार पोलीस ठाण्यात दोन जणांविरुद्ध गंभीर स्वरूपाचा गुन्हा दाखल करण्यात आला आहे. याप्रकरणी फिर्यादी आनंद स्वामीराव सुरवसे (रा. मु. पो. मोट्याळ, ता. अक्कलकोट, जि. सोलापूर) यांच्या फिर्यादीवरून श्रीशैल हुळ्ळी व फुलारी (दोघे रा. सोलापूर) या दोघांवर गुन्हा दाखल झाला आहे.
७ ऑगस्ट २०२६ रोजी दुपारी ३:५५ वाजण्याच्या सुमारास आमदार कल्याणशेट्टी यांच्या पत्नी व मुलाला महावीर चौक येथील ‘प्युमा’ शोरूममध्ये खरेदीसाठी घेऊन आले होते. फिर्यादी हे शोरूमच्या बाहेर थांबले असताना संशयित आरोपी श्रीशैल हुळ्ळी व फुलारी (दोघे रा. सोलापूर) तेथे आले.
आरोपी श्रीशैल हुळ्ळी याने फिर्यादीला “तुला पैसे देतो, तुझ्या दादा आमदाराला गोळी घालून मार, पुढे काय करायचे ते मी बघतो” असे म्हटले. तर आरोपी क्रमांक २ फुलारी याने “तुला साहेब काय म्हणतात ते नीट ऐक, त्यात तुझाच फायदा आहे” असे सांगून फिर्यादीला पैशांचे आमिष दाखवले आणि आमदारांना गोळ्या घालून जीवे मारण्यासाठी प्रवृत्त केले, असे फिर्यादीत म्हटले आहे. या घटनेचा तपास पोलीस करीत आहेत.