प्रतिनिधी । सोलापूर
अण्णासाहेब पाटील आर्थिक विकास महामंडळाचे व्यवस्थापकीय संचालक विजयसिंह देशमुख हे पदाचा गैरवापर करून मराठा तरुणांसाठी जाचक नियम व अटी लावत असल्याचा आरोप महामंडळाचे अध्यक्ष नरेंद्र पाटील यांनी केला. देशमुख यांची चौकशी करून त्यांना पदावरून दूर करावे, अशी मागणी त्यांनी केली.
सोलापुरात पत्रकार परिषदेत पाटील म्हणाले, “महामंडळाची स्थापना मराठा तरुणांना उद्योजकतेसाठी प्रोत्साहन देण्यासाठी झाली आहे. मात्र, जाचक अटींमुळे त्यांच्या मार्गात अडथळे निर्माण होत आहेत. याबाबत व्यवस्थापकीय संचालकांना तीन-चार वेळा पत्र देऊनही दखल घेण्यात आलेली नाही.”
महामंडळाच्या कारभारामुळे मराठा तरुणांमध्ये शासनाविषयी असंतोष निर्माण होत असल्याचेही त्यांनी सांगितले. येत्या दोन दिवसांत मराठा उपसमितीचे अध्यक्ष राधाकृष्ण विखे पाटील यांच्या उपस्थितीत बैठक घेऊन हा मुद्दा मांडण्यात येणार असून, त्यानंतर मुख्यमंत्री देवेंद्र फडणवीस यांची भेट घेणार असल्याचे पाटील यांनी सांगितले.
“व्यवस्थापकीय संचालकांची चौकशी करून त्यांना पदच्युत केले नाही, तर अध्यक्षपदाचा राजीनामा देईन. पदावरून पायउतार झाल्यानंतरही मराठा समाजाच्या प्रश्नांसाठी संघर्ष सुरूच ठेवणार,” असा इशारा नरेंद्र पाटील यांनी दिला.