प्रतिनिधी । सोलापूर
मांजरी बुद्रुकजवळ नांदेड रेल्वे एक्सप्रेसचा विचित्र अपघात; म्हशीच्या धडकेने विजेच्या तारा तुटल्या, एक प्रवासी जखमी!
सोलापूर : पनवेलहून सोलापूरच्या दिशेने जाणाऱ्या हुजूर साहेब नांदेड एक्सप्रेसचा मांजरी बुद्रुक येथे एक भीषण अपघात झाला आहे. रेल्वे रुळावर अचानक म्हैस आल्याने तिला रेल्वेची जोरदार धडक बसली. ही धडक इतकी भीषण होती की म्हैस थेट वरच्या उच्च दाबाच्या विजेच्या तारांना धडकून इंजिनवर जाऊन पडली. या अपघातात ओव्हरहेड विजेच्या तारा तुटून थेट रेल्वेच्या छतावर पडल्याने प्रवाशांमध्ये प्रचंड घबराट पसरली.
प्रत्यक्षदर्शी प्रवाशांनी दिलेल्या माहितीनुसार, म्हशीला धडक बसल्यानंतर प्रचंड मोठ्या आवाजासह ओव्हरहेड विजेच्या तारा तुटून गाडीच्या डब्यांच्या छतावर पडल्या. तारा तुटल्याने मोठ्या प्रमाणावर स्पार्किंग झाले आणि मोठा आवाज झाला. अचानक घडलेल्या या प्रकारामुळे ट्रेनमधील प्रवाशांमध्ये प्रचंड घबराट पसरली आणि भीतीचे वातावरण निर्माण झाले. या दुर्घटनेत सध्या तरी एक प्रवासी जखमी झाल्याची प्राथमिक माहिती समोर येत आहे.
रेल्वे प्रशासनाकडून दुरुस्तीचे काम युद्धपातळीवर
घटनेची माहिती मिळताच रेल्वे प्रशासनाचे वरिष्ठ अधिकारी आणि तांत्रिक पथक तात्काळ घटनास्थळी दाखल झाले. रेल्वे प्रशासनाने या अपघाताला अधिकृत दुजोरा दिला असून, तुटलेल्या विजेच्या तारा आणि ओव्हरहेड सिस्टीमच्या दुरुस्तीचे काम युद्धपातळीवर सुरू करण्यात आले आहे.
या अपघातामुळे पुणे-सोलापूर मार्गावरील रेल्वे वाहतूक काही काळासाठी विस्कळीत झाली असून, दुरुस्तीचे काम पूर्ण झाल्यानंतरच या मार्गावरील वाहतूक पुन्हा पूर्ववत केली जाईल, अशी माहिती रेल्वे सूत्रांनी दिली आहे.