प्रतिनिधी । सोलापूर
सोलापूर शहर पोलीस आयुक्तालयातील सहाय्यक पोलीस उपनिरीक्षक अर्थात एएसआय बाळासाहेब गायकवाड यांनी राष्ट्रवादी काँग्रेस अजित पवार गटाचे नेते उमेश पाटील आणि सुहास कदम यांच्याविरोधात पाच कोटी रुपयांचा मानहानीचा दावा दाखल केल्याने सोलापूरच्या राजकीय आणि पोलीस वर्तुळात खळबळ उडाली आहे.
जिल्हाधिकारी कार्यालयासमोर झालेल्या एका आंदोलनादरम्यान माध्यमांशी बोलताना उमेश पाटील आणि सुहास कदम यांनी आपल्याविरोधात केलेल्या आरोपांमुळे आपली तसेच पोलीस खात्याची सामाजिक पातळीवर बदनामी झाली असल्याचा आरोप बाळासाहेब गायकवाड यांनी केला आहे.या आरोपांमुळे आपली आणि पोलीस खात्याची प्रतिमा मलिन झाली असून, त्यातून आपल्याला मोठी मानहानी सहन करावी लागली, असा दावा गायकवाड यांच्या वतीने करण्यात आला आहे.या प्रकरणी बाळासाहेब गायकवाड यांच्या वतीने अॅड. प्रविण शेंडे यांनी उमेश पाटील यांना कायदेशीर नोटीस बजावली होती. मात्र, या नोटीसीला उमेश पाटील यांनी कोणतेही उत्तर दिले नाही, अशी माहिती अॅड. प्रविण शेंडे यांनी दिली.
कायदेशीर नोटीसीला प्रतिसाद न मिळाल्यानंतर अखेर गायकवाड यांच्या वतीने जिल्हा न्यायालयात पाच कोटी रुपयांचा मानहानीचा दावा दाखल करण्यात आला आहे.दरम्यान, या मानहानीच्या दाव्यामुळे आता उमेश पाटील आणि सुहास कदम यांच्या भूमिकेकडे सर्वांचे लक्ष लागले आहे. या प्रकरणात न्यायालयात पुढील सुनावणीदरम्यान काय घडते आणि संबंधित आरोपांबाबत दोन्ही बाजूंकडून काय युक्तिवाद केला जातो, हे पाहणे महत्त्वाचे ठरणार आहे.पाच कोटींच्या मानहानीच्या दाव्यामुळे सोलापुरातील राजकीय वातावरण पुन्हा एकदा तापण्याची शक्यता आहे.
